काठमाडौं - एक साता लामो केन्द्रीय समिति बैठकपछि नेपाली कांग्रेसले पुनर्जीवन प्राप्त गरेको छ ।

साउन २ देखि १० सम्म बसेको केन्द्रीय समिति बैठकमा खुलेर केन्द्रीय सदस्य र पदाधिकारीले पार्टीले लिनुपर्ने नीति र विचारबारे आफ्नो धारणा राखे । ११ महिनासम्म कांग्रेस केन्द्रीय समिति बैठक बस्न सकेको थिएन ।

अब प्रत्येक दुई महिनामा एकपटक केन्द्रीय समिति बैठक बस्ने मिति नै तोकिएको छ । जसले गर्दा कांग्रेसका निष्क्रिय संगठनहरू चलायमान बन्ने अपेक्षा गरिएको छ । कांग्रेसले एकवर्षे संगठन विस्तार अभियान सुरु गरेको छ ।

जसअनुसार साउन २० देखि ३० आन्तरिक संगठन सुदृढीकरण अभियान सुरु भएको छ । कांग्रेसले यो अभियानका लागि आफ्ना केन्द्रीय सदस्यलाई ७७ जिल्लामै केन्द्रीय प्रतिनिधि तोकेको छ ।

सबै अहिले आ–आफूलाई खटएको जिल्ला र निर्वाचन क्षेत्रमा पुगिसकेका छन् । यो १० दिनसम्म उनीहरूले त्यहाँ पार्टीका भ्रातृसंगठन, तल्लो तहका कमिटीका प्रतिनिधिहरूसँग छलफल गर्नेछन् । के कस्ता कमीकमजोरी छ ? पार्टी नेतृत्वले कस्तो नीति लिनुपर्ने हो ? कसरी अघि बढाउनुपर्ने हो ? सबै विषयमा जानकारी लिएर पार्टीलाई प्रतिवेदन बुझाउने छन् ।

जसबाट पार्टी ती जिल्ला र निर्वाचन क्षेत्रमा आगामी दिनमा लिनुपर्ने नीति र अपनाउनुपर्ने रणनीति अख्तियार गर्न सहज हुने विश्वास लिइएको छ ।

पार्टीको संगठन सुदृढीकरण अभियानमा सहभागी हुन भ्रातृसंगठनहरूले पनि तल्लो तहलाई पत्राचार गरिसकेका छन् । विगत डेढ वर्षसम्म पार्टीका कुनै पनि कमिटी चल्न नसक्दा, भ्रातृसंगठन चलायमान हुन नपाउँदा कांग्रेसका धेरै नेता कार्यकर्ता लाखापाखा लागेका थिए ।

गठबन्धनका कारण आफ्नो भविष्य सुरक्षित नदेखेर नयाँ पार्टीमा जाने कांग्रेस नेता कार्यकर्ताको संख्या पनि धेरै छ । कांग्रेस मतदाता र समर्थककै भोट पाएर नयाँ पार्टीहरू उदय भएका हुन् । अहिले पनि उनीहरूले कांग्रेसकै भोटरलाई आफ्नो भनेर प्रचार गरिरहेका छन् । र, मिसन २०८४ भन्दै हिँडेका छन् ।

उनीहरूको त्यो रणनीतिलाई निस्तेज पार्न पनि कांग्रेसले नयाँ गति लिनैपर्ने थियो । अब भने कांग्रेसले त्यो स्पिरिटलाई पक्रने विश्वास गरिएको छ ।

आफ्ना पहिलेका भोटर मात्रै सुरक्षित गर्न सक्ने हो र कांग्रेसमा नयाँ पुस्तालाई आकर्षण गराउने हो भने कुनै पनि तागतले कांग्रेसलाई साढे चार वर्षपछि फेरि पनि ठूलो दल बन्नबाट कसैले रोक्न सक्दैन ।

कांग्रेसलाई तल्लो तहसम्म र अन्य दलभन्दा कसरी भिन्न बनाउन सकिन्छ भनेर अहिले पदाधिकारी तहमा बसेका र आगामी दिनमा पार्टीको नेतृत्व लिने नेताले सोच्न जरुरी भइसकेको छ ।

कांग्रेसले डेलिभरी दिने विषय र जनमुखी नीति अंगाल्नुपर्ने धेरैको सुझाव छ । यसलाई अहिलेका पदाधिकारी तहमा बसेका धेरै युवा नेताले सुझावका रूपमा ग्रहण गरी अघि बढ्न ढिला भइसकेको छ ।

पार्टी केन्द्रीय समिति बैठकले पारित गरेको महामन्त्री गगन थापाको कार्ययोजनामा कांग्रेसलाई चलायमान बनाउन सक्ने धेरै विषय रहेको नेताहरूको भनाइ छ ।

पार्टीले वर्षभरि गर्नुपर्ने कामको एजेन्डा नै तोकिदिएकाले अब बाध्य भएर नेताहरू जिल्लाजिल्ला जानुपर्ने परिस्थितिको विकास भएको छ ।

मिडिया डबली डट कम २०७३ श्रावण १ गतेबाट डबली नेटवर्क्स प्रा. लि द्वारा संचालित नेपाली भाषाको अनलाइन समाचार पोर्टल हो । अनुसन्धान र खोजमुलक समाचारलाई प्राथामिकता राख्ने यस पोर्टलमा सम्प्रेषित समाचारलाई कपि गरि अन्य साइटमा जस्ताको तस्तै राख्न पूर्ण रुपमा निषेध गरिएको छ । कुनै समाचार कपि गर्ने र अनिवार्य रुपमा ब्याक्लिंक नदिएको पाइएमा प्रचलित साइबर कानुन अनुसार कारवाहि गरिने जानाकारी गराइन्छ ।

यो पनि

कांग्रेस नेता महर्जनको खाना खुवाउने अभियानमा कराँते चेलाको सहयोग

केपी ओलीलाई संसदमा संकट : कांग्रेसले बनायो ‘आक्रामक’ रणनीति, नेकपाभित्रै विरोध

केपी ओलीविरुद्ध संसदमा देउवाको हुँकार, सबैका सामुन्ने खोले एकसे एक पोल !

कांग्रेसकी यी महिला सांसदले पाइन् संसदमा ठूलो जिम्मेवारी !

सिमा अतिक्रमण भएपछि तरुण दल कम्युनिस्ट सरकारसँग आक्रोशित, तत्कालै उचित कदम चाल्न ध्यानाकर्षण

लगनखेल डोजोको भोजन वितरणमा कांग्रेस नेताहरूको सहयोग