काठमाडौं – बागमती र १ नम्बर प्रदेशमा मुख्यमन्त्रीहरूविरुद्ध अविश्वासको प्रस्ताव दर्ता भएर उथलपुथल भइरहेको बेला नेपाली कांग्रेसका सभापति शेरबहादुर देउवाले पार्टीमा गरेको छलफललाई लिएर भ्रम फैलाइएको छ ।
नेपाली कांग्रेसका मुख्य सचिव कृष्णप्रसाद पौडेलले शुक्रबार एक प्रेस नोट जारी गर्दै सभापति देउवाविरुद्ध फैलाइएको भ्रम निवारणको कोसिस गरेका छन् ।
‘दुई प्रदेश सरकारउपर दर्ता गरिएका अविश्वास प्रस्तावमाथि नेपाली कांग्रेसले लिनुपर्ने निर्णय सम्बन्धी विषय र प्रक्रिया सम्बन्धमा छलफल गर्न सभापति शेरबहादुर देउवाले माघ ७ गते प्रदेश १ तथा माघ ९ गते बाग्मती प्रदेशबाट केन्द्रीय समितिमा रहनुभएका साथीहरूको बैठक बोलाउनुभएको थियो । दुवै बैठकमा नेता रामचन्द्र पौडेलको सहभागिता थियोे,’ प्रेस नोटमा उल्लेख छ, ‘छलफल क्रममा सभापति देउवाले ‘आवश्यक निर्णय गर्न प्रदेश संसदीय दललाई अधिकार दिनु व्यावहारिक र लोकतान्त्रिक हुने’ धारणा राख्नुभएको थियो । तर कतिपय सञ्चार माध्यममा योभन्दा विपरीत अस्पष्ट र भ्रमपूर्ण समाचार प्रकाशन भएकोमा ध्यानाकर्षणसहित भ्रम निवाराणार्थ यो प्रेस नोट जारी गरिएको छ ।’
यथार्थ विवरणप्रति सु–सूचित रहेर समाचार सम्प्रेषण गर्न समेत नेपाली कांग्रेसले सबैमा आग्रह गरेको छ ।
मिडिया डबली डट कम २०७३ श्रावण १ गतेबाट डबली नेटवर्क्स प्रा. लि द्वारा संचालित नेपाली भाषाको अनलाइन समाचार पोर्टल हो । अनुसन्धान र खोजमुलक समाचारलाई प्राथामिकता राख्ने यस पोर्टलमा सम्प्रेषित समाचारलाई कपि गरि अन्य साइटमा जस्ताको तस्तै राख्न पूर्ण रुपमा निषेध गरिएको छ । कुनै समाचार कपि गर्ने र अनिवार्य रुपमा ब्याक्लिंक नदिएको पाइएमा प्रचलित साइबर कानुन अनुसार कारवाहि गरिने जानाकारी गराइन्छ ।