कोसीमा एमालेसँग माओवादीको मितेरी, सरकारमा सँगै

मिडिया डबली

आइतवार, चैत्र १२ २०७९

कोसीमा एमालेसँग माओवादीको मितेरी, सरकारमा सँगै

काठमाडौं– केन्द्रमा नयाँ समीकरणसँगै प्रदेश सरकारमा उथलपुथल देखिए पनि कोसी प्रदेशमा भने एमाले र माओवादीबीचको सहकार्य लामै समय जाने देखिएको छ ।
दुईवटा प्रदेशमा मुख्यमन्त्री लिइसकेको र केहीमा साढे दुई वर्षपछि आलोपालो पाउने रोलक्रममै बसेको माओवादीले कोसीमा भने एमालेसँग मितेरी साइनो गाँसेको छ ।

लुम्बिनी र गण्डकी प्रदेश सरकारबाट समर्थन फिर्ता लिँदै बाहिरिएको माओवादी कोसी सरकारबाट भने नहट्ने भएको छ । माओवादी कोसी प्रदेश संसदीय दलका नेता इन्द्रबहादुर आङ्बोले आफ्नो पार्टीले सरकार तत्काल नछाड्ने बताए ।
जबकि प्रधानमन्त्री पुष्पकमल दाहाल प्रचण्डले सबै प्रदेशमा सरकार आलोपालो चल्ने घोषणा गरिसकेका छन् । उनकै निर्देशन मानेर लुम्बिनी र गण्डकी प्रदेशबाट माओवादी मन्त्रीहरू बाहिरिसकेका छन् । तर कोसीमा भने प्रचण्डको निर्देशनलाई बेवास्ता गरिएको छ ।

यदि माओवादीले कोसी प्रदेशमा सरकारबाट समर्थन फिर्ता नलिएमा केन्द्रमा कांग्रेस र एकीकृत समाजवादी तत्काल सरकारमा सहभागी नहुने बुझिएको छ । अन्य प्रदेशमा १० दलीय गठबन्धनअनुसार चल्ने तर कोसीमा भने एमालेसँग माओवादीले सहकार्य गरेमा ठीक नहुने कांग्रेस र एकीकृत समाजवादीका नेताहरूले प्रचण्डलाई चेतावनी दिइसकेका छन् ।

माओवादी नेताहरु भने अंक गणितका कारण कोसी प्रदेशमा समीकरण परिवर्तन गर्न अप्ठेरो भएको दाबी गरिरहेका छन् । कोसी प्रदेशमा सबैभन्दा ठूलो दल एमाले छ । कोसी प्रदेशसभा ९३ सदस्यीय छ । यहाँ बहुमतको सरकार गठनका लागि ४७ सदस्य आवश्यक पर्छ ।

एमालेको ४०, कांग्रेसको २९, माओवादीको १३, राप्रपाको ६, एकीकृत समाजवादीको चार र जसपाको एक मत छ । नयाँ समीकरणअनुसार सरकार बनाउन राप्रपाले साथ दिनुपर्ने हुन्छ । नभए माओवादीले सभामुख छाड्नुपर्ने हुन्छ । माओवादीले सभामुख छाडेमा मात्र कांग्रेस २९, माओवादी १३, एकीकृत समाजवादी चार र जसपाको एक गर्दा ४७ मत हुन्छ ।

त्यसैले माओवादीले अर्कै दलको मुख्यमन्त्री बन्न दिन सरकारबाट नबाहिरिने नीति लिएको बुझिएको छ । कोसीकै कारण केन्द्रमा पनि नेताहरूबीच सम्बन्ध बिग्रिने सम्भावना पनि उत्तिकै छ ।

मिडिया डबली डट कम २०७३ श्रावण १ गतेबाट डबली नेटवर्क्स प्रा. लि द्वारा संचालित नेपाली भाषाको अनलाइन समाचार पोर्टल हो । अनुसन्धान र खोजमुलक समाचारलाई प्राथामिकता राख्ने यस पोर्टलमा सम्प्रेषित समाचारलाई कपि गरि अन्य साइटमा जस्ताको तस्तै राख्न पूर्ण रुपमा निषेध गरिएको छ । कुनै समाचार कपि गर्ने र अनिवार्य रुपमा ब्याक्लिंक नदिएको पाइएमा प्रचलित साइबर कानुन अनुसार कारवाहि गरिने जानाकारी गराइन्छ ।

यो पनि