काठमाडौं-  नेपाली कांग्रेसका पूर्वसभापति शेरबहादुर देउवा स्वदेश फर्किएका छन् । गत ७ चैतमा सिंगापुर उडेका उनी बिहीबार मध्याह्न काठमाडौं फर्किएका हुन् ।

उनलाई त्रिभुवन अन्तर्राष्ट्रिय विमानस्थलमा ठूलो संख्यामा कांग्रेसका नेता कार्यकर्ता तथा समर्थकले स्वागत गरेका छन् । संस्थापनइतर समूहका नेताहरू देउवालाई स्वागत गर्न विमानस्थल पुगेका हुन् । देउवालाई स्वागत गर्न नेता शशांक कोइराला, कृष्णप्रसाद सिटौला, पूर्णबहादुर खड्का, प्रकाशशरण महत, मीन विश्वकर्मालगायत नेताहरू विमानस्थल पुगेका थिए ।

देउवा फर्केलगत्तै शुक्रबार इतर समूहले राष्ट्रिय भेला गर्ने तयारी गरेको छ । राष्ट्रिय भेलाका लागि इतर समूहले सुकेधारास्थित मिराकल पार्टी प्यालेस बुकिङ गरेको छ । राष्ट्रिय भेलाको उद्घाटन समारोह शुक्रबार दिउँसो १ बजे शुरू हुनेछ ।

राष्ट्रिय भेला पूर्वसभापति देउवाको प्रमुख आतिथ्यतामा तीन दिनसम्म चल्ने बताइएको छ । भेलामा पाँच हजार नेता कार्यकर्ताहरूको उपस्थिति हुने इतर समूहको दाबी छ ।

मिडिया डबली डट कम २०७३ श्रावण १ गतेबाट डबली नेटवर्क्स प्रा. लि द्वारा संचालित नेपाली भाषाको अनलाइन समाचार पोर्टल हो । अनुसन्धान र खोजमुलक समाचारलाई प्राथामिकता राख्ने यस पोर्टलमा सम्प्रेषित समाचारलाई कपि गरि अन्य साइटमा जस्ताको तस्तै राख्न पूर्ण रुपमा निषेध गरिएको छ । कुनै समाचार कपि गर्ने र अनिवार्य रुपमा ब्याक्लिंक नदिएको पाइएमा प्रचलित साइबर कानुन अनुसार कारवाहि गरिने जानाकारी गराइन्छ ।