काठमाडौं - फिफा विश्वकप २०२६ मा इजिप्टले ऐतिहासिक प्रदर्शन गरेपछि राष्ट्रिय फुटबल टोलीका मुख्य प्रशिक्षक होसाम हसनको सम्झौता सन् २०३० सम्मका लागि नवीकरण गरिएको छ ।

इजिप्ट फुटबल संघ (ईएफए) ले बुधबार जारी गरेको विज्ञप्तिमा संघका अध्यक्ष हानी अबो रिदाले मुख्य प्रशिक्षक होसाम हसन र टोली निर्देशक इब्राहिम हसनको सम्झौता नवीकरण गर्ने निर्णय सञ्चालक समितिले अनुमोदन गरेको जानकारी दिएका छन् ।

यस विश्वकपमा मोहम्मद सलाहको कप्तानीमा रहेको इजिप्टले अन्तिम–१६ (राउन्ड अफ १६) सम्मको यात्रा तय गर्दै नयाँ इतिहास रचेको थियो । सन् २०१८ पछि पहिलो पटक विश्वकप खेलेको इजिप्टले आफ्नो चौथो विश्वकप सहभागितामै उत्कृष्ट प्रदर्शन गरेको हो ।

प्रि–क्वार्टरफाइनलमा साविक विजेता अर्जेन्टिनाविरुद्ध इजिप्टले २–० को अग्रता बनाएर सबैलाई चकित पारेको थियो । तर अर्जेन्टिनाले १३ मिनेटभित्र लगातार तीन गोल गर्दै खेल ३–२ ले आफ्नो पक्षमा पार्दै क्वार्टरफाइनल यात्रा सुनिश्चित गरेको थियो ।

५९ वर्षीय होसाम हसन फेब्रुअरी २०२४ मा इजिप्टको मुख्य प्रशिक्षक नियुक्त भएका थिए । उनको नेतृत्वमा इजिप्टले सन् २०२५ को अफ्रिका कप अफ नेसन्स (एएफकन) को सेमिफाइनलसम्म यात्रा गरेको थियो । उनले यस वर्षको फेब्रुअरीदेखि औपचारिक राष्ट्रिय सम्झौताबिनै टोली सम्हाल्दै आएको पनि यसअघि बताएका थिए ।

विश्वकपमा होसामको नेतृत्वमा इजिप्टले समूह चरणमा न्युजिल्यान्डलाई ३–१ ले हराउँदै विश्वकप इतिहासकै पहिलो जित दर्ता गरेको थियो । त्यसपछि नकआउट चरणको पहिलो खेलमा अष्ट्रेलियालाई पेनाल्टी सुटआउटमा पराजित गर्दै इजिप्टले विश्वकप इतिहासमै पहिलो पटक नकआउट चरणको खेल जित्न सफल भएको थियो । -एएनआई

मिडिया डबली डट कम २०७३ श्रावण १ गतेबाट डबली नेटवर्क्स प्रा. लि द्वारा संचालित नेपाली भाषाको अनलाइन समाचार पोर्टल हो । अनुसन्धान र खोजमुलक समाचारलाई प्राथामिकता राख्ने यस पोर्टलमा सम्प्रेषित समाचारलाई कपि गरि अन्य साइटमा जस्ताको तस्तै राख्न पूर्ण रुपमा निषेध गरिएको छ । कुनै समाचार कपि गर्ने र अनिवार्य रुपमा ब्याक्लिंक नदिएको पाइएमा प्रचलित साइबर कानुन अनुसार कारवाहि गरिने जानाकारी गराइन्छ ।