काठमाडौं - नेपाल चलचित्र पत्रकार संघको साधारण सभा फागुन १७ गते हुँदैछ । यसपटक नयाँ नेतृत्व पनि चयन गर्ने भएकाले अहिले चलचित्र पत्रकारहरुलाई चुनाव लागेको छ ।

१८ सदस्यीय केन्द्रीय कार्यसमितिमा अहिलेसम्म अध्यक्षमा एकजनाले मात्र उम्मेदवारी घोषणा गरेका छन् । सुरुमा आधा दर्जनले अध्यक्षमा उम्मेदवारी दिने घोषणा गरे पनि अहिलेसम्म राजन घिमिरेले मात्र उम्मेदवारी घोषणा गरेका छन् । अध्यक्षमा विष्णु सुवेदीले उम्मेदवारी दिने भन्दै भेटघाट बढाए पनि उनले सार्वजनिक गरेका छैनन् । घिमिरे र सुवेदीमध्ये अहिले एकजनालाई अघि सार्ने विषयमा छलफल भइरहेको छ ।

अहिलेसम्म घिमिरे र सुवेदीले अध्यक्षमा भोट मागिरहे पनि साधारणसभाकै दिन ‘मिटु आरोपी’ समीर बलामीले उम्मेदवारी दिने भित्री रणनीति बनाएको बुझिएको छ । उनी एमाले निकट प्रेस चौतारीका पत्रकार हुन् । चलचित्र पत्रकार संघको महासचिव बलामीले आफूविरुद्ध ‘मिटु’ आरोप लागेपछि पदबाट राजीनामा दिएका थिए । संघकै केन्द्रीय कार्यसमितिमा रहेकी कान्तिपुरकी एक पत्रकारले आफूमाथि संघका एक पदाधिकारीले यौन दुव्र्यवहार गरेको सामाजिक सञ्जालमा लेखेपछि बलामीले पदबाट राजीनामा दिएका थिए ।

सो घटनाको छानबिन गर्न सुरक्षा भट्टराईको संयोजकत्वमा समिति बनाइए पनि त्यो समितिलाई बलामीले पंगु बनाइदिएका थिए । बरु समितिले पीडितलाई नै उल्टै पीडा दिएको थियो ।

समितिले अहिलेसम्म पीडितको बयानसम्म नलिई असहयोग गर्दै आएको छ । सोही समितिकी संयोजक भट्टराई अहिले महिला उपाध्यक्षमा उठ्ने तयारीमा छिन् । अध्यक्षमा उठ्ने तयारी गरिरहेका बलामीले आफू निकट पत्रकारबाहेक अन्यसँग भोटसमेत माग्न सकेका छैनन् ।

उनले उपाध्यक्षमा आफू निकट अशेष अधिकारी, कुमार आचार्य, सुरक्षा भट्टराई, महासचिवमा रघुनाथ सापकोटा, सचिवमा मनोज न्यौपाने र गोपीकृष्ण चापागाईको प्यानल बनाएका छन् । उनीहरु सबै एमाले निकट प्रेस चौतारीसँग आबद्ध छन् ।

समीर बलामीलाई अध्यक्षमा उठ्न पूर्वअध्यक्ष विदुर गिरी र शान्तिप्रियले जोडबल गरिरहेको चलचित्र पत्रकारहरु बताउँछन् । कतिसम्म छ भने यदि बलामीले अध्यक्षमा जितेमा संघमा रहेका ४० भन्दा धेरै पत्रकारले सामूहिक रुपमा राजीनामा दिने तयारी भइरहेको छ ।

‘मिटु’ आरोप लागेका र विभिन्न अनियमिततामा मुछिएका बलामी अध्यक्ष बन्न अयोग्य रहेको संघमा आबद्ध सिनियर पत्रकारहरुको भनाइ छ । बलामी यस्ता पात्र हुन्, जो हरेक संस्थामा चुनावमा उठ्ने गरेका छन् ।

निर्माता संघ, निर्देशक समाज, चलचित्र पत्रकार संघ, आदिवासी पत्रकार संघ, प्रेस चौतारीलगायत सबै संघसंस्थामा बलामी उठ्दै आएका छन् । अध्यक्षका प्रत्यासी राजन घिमिरे भने डेमोक्रेटिक पत्रकार हुन् ।

उनी साढे दुई दशकदेखि प्रिन्ट र टेलिभिजन दुवै मिडियामा निरन्तर क्रियाशील छन् । उनले व्यावसायिक पत्रकारहरुको टिम बनाएका छन् । उनको प्यानलमा विशाल राई उपाध्यक्षमा, महिला उपाध्यक्षमा शारदा थापा, महासचिवमा प्रदीप कार्की, सचिवमा नवीन गिरी, कोषाध्यक्षमा मनिष कार्की उठ्ने भएका छन् । घिमिरे प्यानलमा रहेका सबै क्रियाशील पत्रकार हुन् ।

मिडिया डबली डट कम २०७३ श्रावण १ गतेबाट डबली नेटवर्क्स प्रा. लि द्वारा संचालित नेपाली भाषाको अनलाइन समाचार पोर्टल हो । अनुसन्धान र खोजमुलक समाचारलाई प्राथामिकता राख्ने यस पोर्टलमा सम्प्रेषित समाचारलाई कपि गरि अन्य साइटमा जस्ताको तस्तै राख्न पूर्ण रुपमा निषेध गरिएको छ । कुनै समाचार कपि गर्ने र अनिवार्य रुपमा ब्याक्लिंक नदिएको पाइएमा प्रचलित साइबर कानुन अनुसार कारवाहि गरिने जानाकारी गराइन्छ ।