काठमाडौं - नेपाल बार एसोसिएसनका पूर्वकोषाध्यक्ष रुद्रप्रसाद पोखरेल र काठमाडौंका जिल्ला न्यायाधीश राजकुमार कोइरालाबीचको करिब १० मिनेटको टेलिफोन संवाद सार्वजनिक भएको छ ।

न्यूज २४ टेलिभिजनले सार्वजनिक गरेको अडियोमा कुराकानीका क्रममा अधिवक्ता पोखरेलले सिभिल सहकारीका पूर्वअध्यक्ष इच्छाराज तामाङलाई धरौटीमा छाड्न आग्रह गर्दै १० करोड रुपैयाँ रकम प्रस्ताव गरेका छन् ।

पोखरेलले तामाङलाई छुटाउँदा आफूहरूको भागमा दुई करोड पर्ने उल्लेख गरेका छन् । त्यसमा निलम्बित प्रधानन्यायाधीश चोलेन्द्रशमशेर जबराको पनि साथ हुने भन्दै उनले प्रलोभन दिएका थिए ।

न्यायाधीश कोइराला र अधिवक्ता पोखरेलबीच व्यवसायी तामाङबीच १० करोडको डिल भएको अडियो सार्वजनिक भएपछि सर्वोच्च अदालत हल्लिएको छ । कामु प्रधानन्यायाधीश दीपककुमार कार्कीले आकस्मिक रूपमा न्याय परिषद्को बैठक बोलाएका छन् ।

‘डेढ बजे आकस्मिक रुपमा बैठक छ भनेर हामीलाई खवर आएको हो,’ परिषदका एक सदस्यले भने, ‘तर एजेण्डावारे बताइएको छैन ।’ पोखरेल एमालेको कानुन विभागका सदस्यसमेत हुन् । तामाङ पनि एमालेका नेता हुन् ।

उनी हाल प्रहरी हिरासतमा छन् । सिभिल सहकारीको करोडौं रुपैयाँ निक्षेप हिनामिना गरेको आरोपमा उनी पक्राउ परेका हुन् । आफ्नो पार्टीका न्याय विभागका सदस्य पोखरेलले १० करोड घुसको बार्गेनिङ गरेको अडियो काण्डले एमालेमा ८ रेक्टरको भूकम्प नै ल्याएको छ ।

मिडिया डबली डट कम २०७३ श्रावण १ गतेबाट डबली नेटवर्क्स प्रा. लि द्वारा संचालित नेपाली भाषाको अनलाइन समाचार पोर्टल हो । अनुसन्धान र खोजमुलक समाचारलाई प्राथामिकता राख्ने यस पोर्टलमा सम्प्रेषित समाचारलाई कपि गरि अन्य साइटमा जस्ताको तस्तै राख्न पूर्ण रुपमा निषेध गरिएको छ । कुनै समाचार कपि गर्ने र अनिवार्य रुपमा ब्याक्लिंक नदिएको पाइएमा प्रचलित साइबर कानुन अनुसार कारवाहि गरिने जानाकारी गराइन्छ ।